Snjallræði

Snjallræði er 16 vikna vaxtarrými (e. incubator) sem styður við öflug teymi sem brenna fyrir lausnum á áskorunum samtímans og styðja við heimsmarkmið Sameinuðu þjóðanna. Það geta verið lausnir sem snúa að heilbrigðisþjónustu, velferðartækni, bættu menntakerfi og jafnréttismálum, svo dæmi séu tekin.

Snjallræði er samstarfsverkefni Háskóla Íslands, Háskólans í Reykjavík og Háskólans á Akureyri. Bakhjarlar Snjallræðis eru Marel og Reyjavíkurborg. Það var stofnað af Höfða friðarsetri árið 2018 og hefur verið keyrt sjö sinnum frá upphafi.

Vaxtarrýmið er í samstarfi við MITdesignX, og er þungamiðja þess vinnustofur þar sem að sérfræðingar frá MIT koma til landsins og deila þekkingu sinni. Þátttakendur fá aðgang að fræðslu og þjálfun frá innlendum og erlendum sérfræðingum á sviði samfélagsmála og nýsköpunar og fundi með reyndum mentorum.

Markmið vaxtarrýmisins er að ýta undir nýsköpun sem tekst á við áskoranir samtímans og er þannig mikilvægur vettvangur fyrir samfélagssprota. Áhersla er á að ýta undir sjálfbærni í nýsköpun og byggja upp sprota sem styðja með beinum hætti við eitt eða fleiri af heimsmarkmiðum Sameinuðu þjóðanna allt frá fyrstu skrefum.

Hér fyrir neðan má sjá fyrirkomulag Snjallræðis árið 2024. MIT designX vinnustofurnar eru fjórar talsins. Þá hitta þátttakendur mentorana þrisvar sinnum yfir tímabilið og taka þátt í ýmsum viðburðum.

5. - 6. september: Understand

Hvaða vandamál er verið að leysa og hver mun njóta góðs af lausninni? 

Áhersla lögð á:

• Þarfagreiningu (e. Needs analysis)
• Markaðskönnun (e. Market segmentation)
• Hagaðilagreiningu (e. Stakeholder map)
• Afbyggingu (e. Deconstruction)

13. september: Hópavinna og mentorafundir

26. - 27. september: Solve

Hver er lausnin og hver er ávinningurinn af henni fyrir hagaðila ? 

Áhersla lögð á:

• Hönnun markmiðs (e. Mission design)
• Virði lausnarinnar (e. Value proposition)
• Ferðalag notandans (e. User journey)
• Hraða úrvinnslu á fyrstu frumgerð (e. Rapid prototyping)

10. október: Hópavinna og mentorafundir

24. - 25. október: Envision

Hverju viljum við ná fram og hvaða gildi liggja til grundvallar við ákvarðanatöku?

Áhersla lögð á:

• Að hanna framtíðarsýn (e. Vision design) 
• Gildi stofnenda og stofnsamninga (e. Founder’s values / negotiations)
• Sjálfbær viðskiptamódel 
• Fólk og samstarfsaðila

8. nóvember: Hópavinna og mentorafundir

21. - 22. nóvember: Execution

Hvernig er best að hrinda lausninni í framkvæmd, skala hana og fjármagna?

Áhersla lögð á:

• Aðgerðaráætlun
• Fjárhagsáætlun
• Fjármögnun 
• Söguna og pitch-ið

6. desember: Hópavinna og mentorafundir

12. desember: Lokaviðburður

Snjallræði styður teymi sem setja sjálfbærni og félagsleg áhrif í öndvegi. Við fögnum nýsköpun á öllum stigum — allt frá hugmyndum á frumstigi til þroskaðra verkefna — þar á meðal rannsóknadrifin verkefni og háskólaverkefni sem hafa möguleika á víðtækum samfélagslegum áhrifum.

Allir sem vinna að nýsköpun geta sótt um — allt frá frjálsum félagasamtökum og fyrirtækjum til nemendahópa — sem eru að þróa hugmyndir með það að markmiði að hafa jákvæð áhrif á samfélagið. Við bjóðum upp á vettvang fyrir djarfar hugmyndir sem gætu þurft tíma til að þroskast, hjálpum teymum að fínpússa sýn sína, kanna sjálfbærar leiðir og breyta flóknum hugmyndum í raunverulegar lausnir.

• 16 vikna prógram í samstarfi við MIT designX
• Aðgang að tengslaneti og ráðgjöf frá öflugum hópi mentora og sérfræðinga á sviði samfélagsmála, heimsmarkmiða Sameinuðu þjóðanna og nýsköpunar
• Aðstöðu í Grósku, suðupotti nýsköpunar í Vatnsmýrinni
• Þjálfun frá erlendum og innlendum sérfræðingum í samfélagslegri nýsköpun

Teymin sem taka þátt í Snjallræði fá að taka þátt í fjórum tveggja daga vinnustofum hér á landi á vegum Svöfu Grönfeldt og samstarfsfélaga hennar frá MIT designX. Vinnustofurnar fara fram á fjögurra vikna fresti en þess á milli njóta teymin handleiðslu færustu sérfræðinga hér á landi við að þróa lausnirnar áfram. Vinnustofurnar eru þemaskiptar og taka á mismunandi þáttum í þróunarferlinu, allt frá þarfa- og hagaðilagreiningu, hönnun á sjálfbæru viðskiptamódeli og fjárhagsáætlunum yfir í tengslamyndun og framkomu.